Txema Luzuriaga Fernández jaiotzez barik bihotzez da deustuarra. Instituzio zein norbanakoek gordetako materialak arakatzen eta batzen segitzen du, baita argazki artxiboaren beharrizana daukatenekin lankidetzan. Horrela egin zuen sasoi baten Hitzartu aldizkarian eta berdin-berdin dihardu gaur egun Berbaizu elkartearen Prest! aldizkariarekin.

Liburu biok plazaratu aurretik, hainbeste erakusketa eginda dago. 1983an Euskadiko Kutxan, 1988an Deustuko Batzokian, 1990an Deustuko Herriko Tabernan, 1993 eta 1994an Deustuko Herriko Tabernan, 1998an Bidarteko udaltegian eta 1999an Bidarte merkataritza gunean. 2000an, BBKren eskutik ‘Deusto en imágenes’ liburua argitaratu zuenean, beste erakusketa bat paratu zuen orain gutxi desagertu zaigun Lizardi liburudendan. Azkenik, 2003an beste erakusketa bat eta diapositiba proiekzio bat egin zuen Deustuko Batzokian.

Gaur egun bere artxiboko argazki erabilgarriak ia 2.500 dira. Bertatik egin da liburu bi hauetako selekzioa. 2005ean argitaratutakoak Deustua udalerri izan zeneko atala (1925 urtea arte) bildu zuen. Bigarren liburu honek, ostera, anexio egunetik (1925) hasi eta gaur egun arte iristen da.

Liburu biotako 500 argazkiekin (200 lehenengoan eta 300 honetan) gure herriaren historia iruditan islatu ahal izan dugu. Gurea herria izan baitzen Bilbo barruan sartu baino lehen. Eta duela 80 urteko gertakari hark gaur egungo deustuarrak ere eragin eragiten ditu.